TOMIÑO

Tomiño súbese de novo ao autobús do teatro  

•  O Centro Dramático Galego porá un servizo de transporte gratuíto para acudir a ver o espectáculo ‘Terceiro acto’, o 10 de outubro a Santiago  

Infogauda / Tomiño  

 Tomiño volver ser unha das paradas do autobús do teatro do Centro Dramático Galego (CDG). Ao abeiro do seu Programa de Mobilidade, o vindeiro 10 de outubro o CDG trae de novo ao municipio tomiñés un servizo de transporte público de balde co que busca achegar a súa produción cultural e teatral ao público e á veciñanza de toda Galicia.  

 O Concello forma parte de novo desta iniciativa que permitirá achegar a tomiñeses e tomiñesas ata o Salón Teatro, de Santiago de Compostela, e desfrutar da representación de ‘Terceiro acto’, unha produción do CDG dirixida por Andrea Jiménez e Noemí Rodríguez, que convida a reflexionar sobre a última etapa da vida e reivindica o papel das persoas maiores na sociedade actual.  

 A cita será o xoves 10 de outubro, data na que o autobús do teatro parará na rotonda da avenida República Arxentina para saír ás 15.30 horas cara a Santiago para ver a función, que comezará ás 18.00 horas e regresar de novo a Tomiño ás 20.30 horas. O programa inclúe o desprazamento de ida e volta gratuíto e un desconto para asistir ao espectáculo, que contará con entradas a 5 euros.   

 Con este programa, o Centro Dramático Galego reformula o formato tradicional dunha xira, superando os límites xeográficos e achegando ao público a unha localización estratéxica como alternativa a desprazar a produción ao completo. A alcaldesa de Tomiño, Sandra González, destaca a relevancia de iniciativas como esta para achegar a cultura a todos os públicos, “dun xeito asequible sen importar onde viva. O teatro é unha ferramenta fundamental para a reflexión e o crecemento persoal e programas como o do CDG permiten á nosa veciñanza un acceso directo a espectáculos de gran calidade dunha forma doada, fortalecendo o tecido teatral e cultural galego”.  

 As persoas interesadas poderán solicitar máis información no teléfono 986 622 001 e inscribirse a través da web municipal.