1 de feb. de 2017

PONTEVEDRA

Música, poesía, danza e improvisación oral para celebrar a concesión do premio da Cultura Galega ao Museo de Pontevedra 

A Deputación organiza un acto de recoñecemento ao Museo que terá lugar o vindeiro sábado día 4 ás 19 horas no Sexto Edificio  

O deputado provincial de Cultura e Lingua, Xosé Leal, e o director do Museo de Pontevedra, Carlos Valle
Foto: D. P.

Infogauda / Pontevedra

 Baixo o epígrafe "Museo de Pontevedra. Pasado, Presente, Futuro", a Deputación organiza un acto para compartir coa cidadanía e cos traballadores e traballadoras do Museo o Premio da Cultura Galega concedido á institución museística no apartado Patrimonio Cultural. O acto, que estará presidido pola presidenta do ente provincial, Carmela Silva, terá lugar o vindeiro sábado día 4 de febreiro ás 19 horas no Sexto Edificio. Así o anunciaron esta mañá o deputado provincial de Cultura e Lingua, Xosé Leal, e o director do Museo de Pontevedra, Carlos Valle. Todas as persoas interesadas en asistir a este acto poderán facelo previa recollida do correspondente convite no mostrador de entrada do Sexto Edificio, e poderán recollerse dous convites por persoa a partires desta tarde.  

 "Con este acto institucional queremos introducir ademais novas disciplinas que conecten coa idea de pasado, presente e futuro desta institución" indicou Xosé Leal. O deputado fixo públicas as actuacións previstas, a través das que se tratará de conxugar tradición con contemporaneidade. Así, a primeira actuación corresponderá ao violinista Sergio Heredia, que interpretará pezas de  Manuel Quiroga, nunha clara referencia á historia e aos fondos do Museo. Tamén fará unha breve intervención a cantautora Alba María acompañada do músico Felipe Villar, que interpretará un tema de composición propia incluído no seu traballo "Aínda" e unha peza repentizada, isto é, unha performance literaria a través da improvisación oral. No eido da perfomance tamén terá presenza a poeta Tamara Andrés, que será a encargada de poñer sobre o escenario unha peza na que combinará poesía e audiovisual. E por último, a música tradicional combinada con danza contemporánea e con baile tradicional correrá a cargo de Davide Salvado que estará acompañado de Daniel Pardo e Rosi Leiro. "Temos un Museo cun pasado excepcional, cun presente no que destaca por ser un Museo de referencia tanto pola colección permanente como polas exposicións temporais, e cun futuro no que queremos que siga sendo un espazo vivo e chegar a novos públicos, e neste sentido parécenos moi axeitado introducir elementos novos para que a xente se sinta identificada con este Museo" asegurou Xosé Leal.  

 Ademais do apartado artístico, o acto contará coas intervencións institucionais do propio deputado de Cultura e Lingua, Xosé Leal, da presidenta da Deputación, Carmela Silva, do alcalde de Pontevedra, Miguel Anxo Fernández Lores, e do director do Museo, Carlos Valle, que intervirá no nome de todo o equipo da institución museísitica.  

 Carlos Valle, pola súa banda, volveu facer fincapé en que o Premio da Cultura Galega debe servir "para seguir traballando con máis ilusión aínda se cabe". O director do Museo asegurou que se trata dun "premio colectivo, e dun premio moi ben recibido". Valle afirmou que o Museo de Pontevedra posúe "pezas excepcionais e de vital importancia na historia da cultura galega" e indicou que este premio "non corresponde a o labor dunha persoa en concreto senón a toda unha traxectoria". Neste sentido, lembrou que a historia da institución se debe remontar a 1894, coa creación da Sociedad Arqueológica de Pontevedra, á que cualificou como os verdadeiros inicios do Museo de Pontevedra, que sería creado en 1927 e que en 1929 contaría co primeiro padroado, que denominaría como primeiro director a Casto Sampedro.  

 O Premio da Cultura Galega concedido ao Museo de Pontevedra foi recollido o pasado 23 de xaneiro por Carlos Valle na Cidade da Cultura. No acto institucional de entrega destes premios, o director do Museo reivindicara a importancia da institución na preservación e conservación do amplo patrimonio artístico que conforma a súa colección permanente e remitírase á cita de Sánchez Cantón "bastante constancia, moito traballo e máis amor" para continuar co legado da institución.

Ningún comentario: